Image description
Америкийн экс тагнуул, Орост толгой хоргодож буй Эдвард Сноуден алдарт “The Guardian”-д ярилцлага өгчээ. “Тагнуулын программ худалдахын эсрэг дэлхийн улс орнуудын Засгийн газар даяаршсан моратори тогтоох ёстой. Эс тэгвэл ойрын ирээдүйд хакеруудын халдлагыг тэсвэрлэх хамгаалалтай нэг ч гар утас үлдэхгүй. Израилийн “NSO Group” компаний “Pegasus” шиг программ хангамжууд маш хүчирхэг, яг цөмийн зэвсэг шиг. Энгийн хүмүүст ямар ч шанс байхгүй” хэмээн Эдвард Сноуден мэдэгдлээ. Түүнээс сэтгүүлч “Хүмүүс иймэрхүү программ хангамжаас яаж хамгаалах вэ?” гэж асуухад Сноуден “Хүмүүс цөмийн зэвсгээс өөрсдийгөө яаж хамгаалж чадахав?” гэж хариу асуув. 
“NSO Group” компаний “Pegasus” тагнуулын программын талаар манай сайт өмнө нь мэдээ хүргэсэн (Төрийн тэргүүн, ЕС, сэтгүүлчдийн гар утсыг чагнаж тагнадаг нь илэрлээ http://massnews.mn/a/1288). Ийм ПХ-ын тусламжтай ямар ч гар утсанд нууцаар халдаж мэдээлэл цуглуулах боломжтой ажээ. Цахим шуудан, мессеж, харилцагчид, газар зүйн байрлал, гэрэл зураг, бичлэг гээд бүгдийг гар утсаас татах чадалтай, үүний зэрэгцээ камер ба микрофоныг идэвхжүүлж хэрэглэгч юу хийж буйг нууцаар бичдэг юм байна. 
“Хор хөнөөлтэй арилжааны программуудыг угаасаа үйлдвэрлэх ёсгүй, дарангуйллын дэглэмүүдэд үүнийг зарж болохгүй. Арилжааны, тагнуулын ийм программын ачаар мөрдөлт мөшгилт одоо эдийн засгийн хувьд төрд маш ашигтай болсон. Хууль сахиулах байгууллагууд одоо зайнаас, бага зардлаар, эрсдэлгүй тагнах ажиллагааг жаахан ч болов сонирхол төрүүлсэн бүх хүний эсрэг үргэлж явуулах болно. Одоо бүгдийн гар утас ав адилхан, iPhone л гэхэд дэлхий даяар ганцхан программ хангамжийг ашигладаг. Хэрэв тэд нэг iPhone-д нэвтэрч чадсан бол үлдсэн бүгд рүү халдах аргаа олно. Асуудлыг шийдэх ганц арга бий, энэ бол түүний борлуулалтад олон улсын мораторий тавих явдал. ₮NSO Group₮ дэлхийг аврах гэж биш мөнгө хийх гэж үүнийг хийдэг. Энгийн хүмүүс одоо хамтдаа хөдлөх ёстой. Энэ бол ганцаар шийдэх асуудал биш, та тэрбумтан компаний эсрэг ганцаараа зогсох болно шүү дээ. Хэрэв та нар өөрсдийгөө хамгаалъя гэвэл тоглоомын дүрмийг өөрчлөх хэрэгтэй. Энэ худалдааг зогсоож чадвал бид хүссэндээ хүрнэ” гэж Сноуден зөвлөжээ.