Image description
Америк тэрбумтнуудын сансрын уралдаан үргэлжилсээр. “Amazon” компаний экс ерөнхий захирал 57-настай Жефф Безос 3 хүнтэй цуг өөрийн компаний сансрын хөлгөөр нисээд ирлээ. Нөгөө 3 нь бол Безосын дүү 53-тай Марк, 82 настай нисгэгч эмэгтэй Уолли Фанк, 18-тай Оливер Деймон нар. Техасын элсэн цөлийн “Blue Origin” талбайгаас 7 сарын 20-нд орон нутгийн цагаар 9:13-т хөөрсөн “New Shepard” сансрын хөлөг Карманы шугам буюу сансар ба агаар мандлыг заагласан хилийг давж 107 км өндөрт хөөрчээ. “Безосын баг 107 км өндөрт гарсан тул өмнө нь сансарт хөөрсөн тэрбумтан Ричард Брэнсоныг 21км-ээр давлаа. Безос энэ удаа давхар дээд амжилт тогтоов, түүнтэй цуг хүн төрөлхтөний түүхэнд хамгийн залуу, хамгийн хөгшин хүн сансарт ниссэн” гэж “Newsweek” бичжээ. 
Сансраас эх дэлхийдээ буцаж ирсний дараа Безос “Энэ бол миний амьдралын хамгийн сайхан өдөр. Би 5 настайгаасаа л энэ тухай мөрөөдсөн билээ” хэмээн мэдэгдэв. Одоо түүний хөрөнгө 187 тэрбум доллар, бараг л 200 тэрбум. Энэ мөнгийг зүйрлэвэл манай хойд хөрш 146 сая хүн амтай Орос улсын бүтэн жилийн төсөвтэй тэнцэнэ. Жозеф Безос бол “Blue Origin” сансар, нисэх компаниас гадна “The Washington Post”-н эзэн. Безос жирийн нэгэн бизнесмэн байхдаа 2000 онд сансрын компаниа байгуулжээ. Мань эр хүүхэд насны мөрөөдлөө биелүүлэхээр 20 жил зүтгэсэн. За, бараг л гараашаас сансрыг байлдан дагуулсан гэж түүний тухай хэлж болно. Машины гараашаас ном зарж эхэлсэн "Амазон" компани нь одоо америкчуудын гол онлайн дэлгүүр болон хувирчээ, тэндээс хорвоо дээрх бүхнийг худалдан авах боломжтой. Дэлхийн хамгийн баян хүмүүсийн нэг Безос цаашид ч сансартай хувь заяагаа холбон, Дэлхийн орбит дээр бүхэл бүтэн хот барихаар төлөвлөж байна, нэг биш нилээдийг. 
Сонирхуулахад, хамгийн ахмад настай Уолли Фанк бүр 1961 оноос сансарт нисэхээр бэлджээ, “NASA” тухайн үед 13 бүсгүйг сансрын хөтөлбөрт хамруулж бэлдэхэд шилдгүүдийн нэг байсан. Гэвч бүсгүйчүүдийн хэн нь ч тэгэхэд сансарт нисээгүй. Харин Голландын иргэн, 18-тай Оливер Дэймен  үнэхээр санамсаргүй сансарт хөөрсөн гэж болно. Безосын компани сансрын жуулчны 1 тасалбарыг дуудлага худалдаагаар зарахад нэрээ нууцалсан этгээд 28 сая доллараар худалдан авсан билээ. Гэвч дараа нь нөгөө этгээд гэнэт татгалзсан учраас оронд нь Дэймен ниссэн хэрэг. Дэймен уг нь Безосын компаний сансрын хөлгийн 2 дахь нислэгийн тасалбарыг худалдан авчээ. Дэймен 1 жилийн өмнө сургуулиа төгссөн ба саяхан нисгэгчийн дамжаа дүүргэсэн юм.  Түүний эцэг Оливер бол Голландын баячуудын нэг, хөрөнгө оруулалтын том компаний эзэн юм байна.