Image description
Перу улсын Ерөнхийлөгчийн сонгуулийн 2 дахь шатны дүн гарлаа. 51 настай Педро Кастильо нийт сонгогчдын 50,12%-ийн санал авч ялалт байгуулжээ. Гэхдээ тэр багахан тооны саналаар яллаа, тодруулбал өрсөлдөгчөөсөө 44 мянган санал илүү авсан. Энэ бол 32 сая хүн амтай орны хувьд маш бага зөрүү юм. 
Энэ сонгуульд ялсан Педро Кастильогийн гол уриа бол “Баян оронд цаашид ядуус гэж байхгүй”. Түүнийг Перу улсын түүхэнд байгаагүй хамгийн ядуу Ерөнхийлөгч гэж нэрлэжээ. Тариачны гэр бүлд төрж өссөн Кастильо сургуулийн багшаар ажиллаж байгаад Үйлдвэрчний эвлэлийн зүтгэлтэн болжээ. Тэр 4 жилийн өмнө ажил хаялтыг зохион байгуулж Засгийн газрыг цалин нэмэхэд хүргэсэн учраас орон даяар алдаршсан гэдэг. Перугийн иргэд бас Педро Кастильог тус улсын түүхэнд байгаагүй хамгийн зүүний Ерөнхийлөгч гэж байна. Учир нь түүний сонгуулийн амлалтад уул уурхайн салбарыг төрийн өмчид авна, 1 сая ажлын байр бий болгоно, баячуудын татварыг нэмнэ зэрэг том том зорилт багтжээ. Дашрамд дурдахад, Перу бол зэс олборлолтоор дэлхийд 2-т жагсдаг, түүнчлэн алт, мөнгө, нефть зэрэг ашигт малтмалаар баялаг орон билээ. Кастильо түүнээс гадна ижил хүйстэний гэрлэлт зэрэг Өрнөдийн нялзаадаг бодлогын эсрэг тууштай зогсдог бөгөөд гэмт хэргийн ихэнхийг үйлддэг хууль бус цагаачдыг албадан гаргана гэж мөрийн хөтөлбөртөө тусгажээ.