Image description
Star Trek” цуврал киноны од Уильям Шетнер өөрөө сансарт нисч дээд амжилт тогтоосон тухай “CBS News” мэдээлэв. Тэрбээр энэ киноны ахмад Киркийн дүрд тоглож байхдаа асар олон удаа сансарт аялсан бол одоо өөрөө жинхэнэ ёсоор тэнд очоод ирлээ. 90 настай Уильям Шетнер лхагва гарагт “Blue Origin” компаний хөлгөөр хөөрч сансарт зочилсон хамгийн хөгшин хүн болжээ. Түүнтэй цуг 3 хүн сансрын хөлгөөр ниссэн, тэд бол “Blue Origin” компаний сансрын нислэг хариуцсан дэд ерөнхийлөгч Одри Пауэрс, Австралийн бизнесмэн Крис Бошуизен, микробиологч Глен де Врис нар. Сансрын багийнхан 108 км өндөрт хөөрч эх дэлхийгээ сансраас харж жингүйдэлд 3-4 минут байгаад буцаж ирэв. Тэдний нислэг 10 минут 17 секунд үргэлжлээд дэлхийдээ газардлаа. Шетнер бууж ирсний дараа сэтгэгдлээ хуваалцаж компаний тэргүүн Жефф Безост талархсанаа илэрхийллээ. “Миний сэтгэл маш хүчтэй хөдөлж догдолж байна. Энэ үнэхээр итгэмээргүй. Безос надад төсөөлшгүй сайхан аялал бэлэглэлээ. Одоо мэдэрч байгаа бүхнээ би үүрд хадгалж хэзээ ч мартахгүй” гэж тэрбээр ярилаа. Харин Де Врис “Ахмад Кирктэй ниссэн энэ нислэг бол уран зөгнөл одоо шинжлэх ухаан болж хувирсныг бүрэн батлав. Гэхдээ бид өөрийн найз Биллтэй ниссэн шүү” гэхэд хариуд нь Шетнер “Айж мэгдсэн жижиг Биллитэй. Чи энэ тухай ярьсанд би их баярлаж байна. Ахмад Кирк бол санаанаас зохиосон дүр, харин би бол мах цусаас бүрдсэн” гэж хошигнов. “Хүн төрөлхтөний шилдэг төлөөлөгчдийг Star Trek-н ахмад Киркгүй төсөөлшгүй. Тиймээс манай гарагийн.... шилдэг төлөөлөгчтэй цуг нисэх нь уран зөгнөл билээ” гэжээ. Европын сансрын агентлагийн сансрын нисгэгч Маттиас Маурер “Энэ нислэг надад гүн сэтгэгдэл төрүүлсэн. Тэр 90 настай, хүн бүр ийм насандаа ч сансарт нисч болохыг харууллаа” хэмээжээ. Нэмж өгүүлэхэд, Уильям Шетнер бол жүжигчин төдийгүй зохиолч, кино зохиолч, режиссер продюсер билээ. 
Нэмж өгүүлэхэд, тэрбумтнууд хоорондоо уралдан сансрын жуулчдыг илгээж байгааг Английн ирээдүйн хаан Уильям хурц ширүүнээр шүүмжлэв. Шетнерийг сансарт нисээд ирснээс хойш хэдхэн цагийн дараа ханхүү Уильям “Баячууд юуны өмнө Эх дэлхийн асуудлуудыг шийдэхэд анхаарлаа төвлөрүүлэх ёстой. Дараа амьдрах боломжтой газрыг хайхад биш харин энэ гараг дэлхийгээ нөхөн сэргээхэд л дэлхийн агуу оюун ухаантнууд хэрэгтэй. Цаг уурын өөрчлөлтийн эсрэг юу ч хийхгүй байх нь манай хүүхдүүдийн ирээдүйг үгүй хийж байна” хэмээн мэдэгджээ.