Image description
Монгол Улсын Ерөнхий сайд Л.Оюун-Эрдэнэ “Оюу толгой” төслийн яриа хэлэлцээтэй холбогдуулж “Рио Тинто” компаний Гүйцэтгэх захирал Якоб Стаусхольм болон бусад төлөөллийг хүлээн авч уулзлаа. Энэ үеэр Ерөнхий сайд Л.Оюун-Эрдэнэ “Оюутолгой ордын ашиглалтад Монгол Улсын эрх ашгийг хангуулах тухай” Улсын Их Хурлын 2019 оны 92-р тогтоолын хэрэгжилтийг хангаж, яриа хэлэлцээ тодорхой үр дүнд хүрэх шаардлагатай байгаа тухай онцлов. Тухайлбал, гүний уурхайн бүтээн байгуулалтын зардал хэтэрч хугацаа хойшилсон асуудалд “Рио Тинто” компани хариуцлага хүлээж, шаардлагатай нэмэлт зардлыг санхүүжүүлэх ёстойг анхааруулж, төрийн эзэмшлийн 34 хувьд ногдох өрийг бүрэн тэглэж, Монгол Улс тус төслөөс ногдол ашиг авах нөхцөлийг бүрдүүлж ажиллах хэрэгтэй талаар Ерөнхий сайд цохон дурдлаа. Мөн байгуулагдсан цагаасаа хойш маргаан дагуулсан Дубайн гэрээ буюу “Оюу толгой” төслийн Гүний уурхайн бүтээн байгуулалт, санхүүжилтийн төлөвлөгөөг ойрын үед цуцлахад “Рио Тинто” компани анхаарах ёстой, цаашид “Оюу толгой” төслийг харилцан ашигтай, Монголын ард түмний эрх ашигт нийцсэн болзлоор хэрэгжүүлэх нөхцөлийг бүрдүүлж ажиллах хэрэгтэй хэмээн “Рио Тинто” компанид Ерөнхий сайд Л.Оюун-Эрдэнэ сануулжээ. Мөн тэрбээр Монгол Улсад ирэх үр өгөөжийг 2010 оны ТЭЗҮ-д үндэслэж гаргах нь зөв гэж хэллээ. 
“Рио Тинто” компаний Гүйцэтгэх захирал Якоб Стаусхольмын зүгээс Монгол Улс дахь үйл ажиллагаандаа анхаарч, аль болох ил тод, нээлттэй хамтарч ажиллахад бэлэн байгаагаа илэрхийлсэн ба харилцан итгэлцэлд суурилсан хамтын ажиллагааг шинэ түвшинд хүргэх болно хэмээв.   
Ерөнхий сайд Л.Оюун-Эрдэнэ өмнө нь буюу 2020 оны 12-р сард Засгийн газрын Хэрэг эрхлэх газрын даргын үүрэг гүйцэтгэж байхдаа “Рио Тинто” компаний Гүйцэтгэх захирлаар тухайн үед дөнгөж томилогдоод байсан Якоб Стаусхольмтой цахим уулзалтыг Засгийн газрын Ажлын хэсгийн ахлагчийн хувиар хийж, “Оюу толгой төсөлтэй холбогдуулж Засгийн газраас байгуулсан Ажлын хэсгийг ахлах хугацаанд баримталсан бодлого, байр суурь огт өөрчлөгдөөгүй" гэдгээ илэрхийлсэн юм. Тэрбээр энэ удаад ч мөн өөрийн байр суурь өөрчлөгдөөгүй гэдгийг нотоллоо. Улсын Их Хурлын 2019 оны 92 дугаар тогтоолын хэрэгжилтийг хангах хүрээнд байгуулсан Засгийн газрын Ажлын хэсгийг одоо Хууль зүй, дотоод хэргийн сайд Х.Нямбаатар ахлан ажиллаж байна.