Image description

Өнөөдөр манай гараг даяар Дэлхийн эрүүл мэндийн өдрийг тэмдэглэж байна. 1950 оноос эхэлж жил бүр тэмдэглэж буй энэ өдөр улс орнууд аль нэг сэдвээр урт хугацааны хөтөлбөр хэрэгжүүлж эхэлдэг уламжлалтай. 2018 онд “Эрүүл мэндийг хүн бүрд”, 2019 онд “Эрүүл мэндийн үйлчилгээнд бүгдийг хамруулах ёстой” гэсэн уриатай байсан бол 2020 онд бүгд сувилагч, эх баригчдыг дэмжсэн билээ. 2021 оны уриа бол “Илүү шударга, илүү эрүүл дэлхийг байгуулъя”.

НҮБ-ын ерөнхий нарийн бичгийн дарга Антониу Гутерреш “Улс орны дотоодод болон дэлхийн орнуудын хооронд эмнэлгийн үйлчилгээ тэгш биш, шударга бус байгааг, мөн нийгмийн хамгааллын системд цоорхой үүссэнийг Цар тахал илчиллээ. Хамгийн гол нь эрүүл мэндийн салбар дахь даяаршсан хямралд дэлхийн олон нийт бэлэн биш байлаа” гэж мэдэгджээ. Дэлхийн хүн амын дор хаяж тал хувь нь хамгийн энгийн эмнэлгийн үйлчилгээ авах боломжгүй байна, мөн 800 сая хүн төсвийнхөө 10%-ийг эмнэлгийн үйлчилгээ авахад зарцуулдаг гэж судлаачид онцлон тэмдэглэв.

“Коронавирүсийн цар тахлаас болж зарим улс оронд эмнэлэг дүүрч, өвдсөн хүн бүрт тусалж чадахаа больжээ. Ковидтой өвчтөнүүд төдийгүй хавдар болон өөр архаг өвчтэй хүмүүс тусламж авч чадахгүй тохиолдол гарсаар байна. “COVID-19” вакцин тэгш бус хуваарилагдаж байгаагийн улмаас Цар тахлын эсрэг тэмцэл бүтэлгүйтэж болзошгүй” гэж Дэлхийн эрүүл мэндийн байгууллага сэрэмжлүүллээ. Түүнчлэн эмнэлгийн ажилтнуудын хомсдол үүссэн тухай ДЭМБ анхааруулав. Одоо 2,5 сая эмч, 9 сая сувилагч, эх баригч, 6 сая бусад ажилтан нэн шаардлагатай байгаа аж.