Image description

Италийн олон хотод Хөл хориог эсэргүүцсэн том жагсаал, эсэргүүцлийн ажиллагаа явагдлаа. Жагсагчдын ихэнх нь зоогийн газар, нийтийн хоолныхон, аялал жуулчлалын дэлгүүр, фитнес төвийн эзэд, ажилтнууд аж. Коронавирүсийн тархалтыг хязгаарлахаар төр засгаас авсан олон арга хэмжээг тэдний бизнес, үйл ажиллаг бүрэн эсвэл хэсэгчлэн зогсоосон учраас ийнхүү гудамжинд гарчээ. Зөвхөн Апеннинд гэхэд 4 сарын сүүл хүртэл дэлгүүрүүдийг хааж, зоогийн газрууд зөвхөн хүргэлтээр үйлчлэх журам гарчээ. “Бид бизнесмэнүүд, худалдаачид болохоос гэмт хэрэгтнүүд биш” гэж хүмүүс гудамжинд жагсч явахдаа хашгиралдаж байв. Ийм эсэргүүцлийн ажиллагаа Италийн олон хотод зэрэг явагдсан. Зарим нутагт жагсагчид ба цагдаа нарын хооронд мөргөлдөөн үүсч улмаар шархдаж бэртсэн хүмүүс байгаа тухай “Ansa” агентлаг дамжуулав. Мөн эсэргүүцлийн ажиллагаанд оролцогсдоос олон хүнийг баривчилжээ.

Ромын Монтечиторио талбай дээр парламентын барилгын гадаа жагсагчид үе үе цагдаагийн бүслэлтийг сэтлэн дотогш орох гэж оролдон, хуванцар болон шилэн лонхыг шидэж салют зэрэг пиро техникийн хэрэгсэл ашиглаж байлаа. Тэдний дунд барууны болон зүүний чиглэлтийн хэт даврагчид байсан ба олон хүн маскгүй явж байв, уг нь энд заавал эмнэлгийн зориулалттай, нарийн шүүлтүүртэй маск зүүх журам үйлчилдэг юм байна. Зарим ХМХ-д бичсэнээр Ром хотод эсэргүүцлийн ажиллагаанд оролцогчид өмнө нь АНУ-д болсон Капитолийн довтолгоог давтах гэж оролджээ. Тэр бүү хэл Америкийн Конгресс рүү халдсан эвэртэй баг өмссөн хүнийг дуурайн хувцасласан хүн ч харагдав. Гэхдээ эндхийн жагсагчид парламент руу нэвтэрч чадсангүй.