Image description

АНЭУ-ын Дубайд уран бүтээлчдэд зориулсан шинэ, креатив бүс байгуулагджээ. “Al Quoz Creative Zone” хэмээх энэ бүсэд зураач, дизайнер зэрэг уран бүтээлчид амьдарч уран бүтээл, бүтээгдэхүүнээ туурвих төдийгүй нийтэд дэлгэн үзүүлэх, зарж борлуулах бүх нөхцөл бүрдсэн байна. Мөн алдартнууд энд мастер-класс хичээлээ явуулах боломжтой. Энэ бүс нь АНЭУ-ын эдийн засгаа хөгжүүлэх стратегийн хүрээнд хэрэгжүүлж буй том төсөл. Гадаадын уран бүтээлчид тусгай виза авч энд ирж ажиллаж хөдөлмөрлөж болно. Тэдэнд зориулан урлан ба үзэсгэлэнгийн талбайг хөнгөлөлттэй үнээр түрээслэхийн зэрэгцээ импорт, экспортын татвараас чөлөөлж, логистик дэмжлэг үзүүлэх аж. Энэхүү креатив кластерт боловсролын шинэ төсөл, санаачилгыг хэрэгжүүлнэ.
“Зохиолчид, кино урлагийнхан, программ хангамжийн мэргэжилтнүүд, загварынхан, хөгжмийн зохиолчид, зураачид болон бусад уран бүтээлч хүсвэл энд шинэ бизнес санаагаа шууд амьдралд нэвтрүүлэх боломжоор хангагдана” гэж Арабын энэ орны эрх баригчид амлаж байна. Иймээс үзэсгэлэнгийн танхим, аж төрөх орчныг тохижуулж хүнсний болон бусад дэлгүүр гээд хүний хэрэгцээг хангах бүх төрлийн үйлчилгээ цөм бүрэн. Тэр бүү хэл дугуйн болон скутерийн, явган зорчигчдын зугаалах замыг барьж байна. Одоогийн байдлаар уран бүтээлчид өөрийн компаниа Дубайн дараах чөлөөт бүсэд бүртгүүлэх боломжтой:  Dubai Internet City, Dubai Media City, Dubai Production City, Dubai Studio City, Dubai Design District. Дубайн креатив компаний тоо одоо 8000 орчим бол ойрын 5 жилд 15000 хүрч өснө гэж АНЭУ-ын эрх баригчид төлөвлөж байна. Энд одоогоор 70 мянга орчим уран бүтээлчид амьдарч туурвиж байгаа бол 5 жилийн дараа 150 мянга болж ажлын байр ч нэмэгдэнэ гэж арабууд мэдэгдлээ. Тэд хөрөнгө оруулалтын орчинг сайжруулах, хууль тогтоомжоо өнөөгийн нөхцөл байдалд зохицуулан өөрчлөх тал дээр анхаарч эхэлжээ. 
Товчоор өгүүлбэл, АНЭУ өнөөдөр мэдлэг, инноваци дээр суурилсан ирээдүйн эдийн засгаа байгуулж байна. Арабын энэ орон байгалийн асар их баялагтай ч шавхагдаж дуусахаас өмнө ийнхүү өөр салбарт хөрөнгө оруулан эрчимтэй хөгжүүлж эхэлжээ. Сонирхуулахад, дэлхийн креатив эдийн засаг ид цэцэглэн хөгжиж байна. Энэ салбарт нийт 2,25 триллион орлого олох төлөвтэй, энэ бол Дэлхийн ДНБ-ий 10% юм. Түүнчлэн 30 сая ажлын байр бий болно.