Image description
Европын хөлбөмбөгийн аварга шалгаруулах тэмцээний 1/4 финалд тоглох зарим орон тодорлоо: Дани, Итали, Чех, Бельги. Тухайлбал, Бельгийн шигшээ баг одоо Италитай тоглоно. Чех улс Даний эсрэг үзэлцэнэ. Хамгийн гайхалтай нь, Европын аварга Португалийн шигшээ багийг 1/8 финалд Бельгийн шигшээ баг 1:0 харьцаатай ялчихлаа. Цорын ганц гоолыг 42 дахь минутад Бельгийн довтлогч Торган Азар оруулжээ.
Португалийн шигшээ багийн дасгалжуулагч Фернандо Сантуш “Манай хөлбөмбөгчид 100% биеэ дайчилж тоглосон. Тэд хамаг хүчээ гаргасан ч ялагдлаа. Бид цааш тоглож финалд хүрч ялна гэж итгэж байсан юм... Энд шударга ёс яриад яахав, зүгээр л бид хаалгандаа айлын гоол оруулсан ч хариу гоол хийж чадаагүй. Ялагдлын дараа манай зарим тамирчин хувцас солих өрөөнд уйлсан. Энд азтай, азгүй гэж байхгүй. “Алтан бөмбөг”-ийн 5 удаагийн эзэн Криштиан Роналдо энэ “Евро 20”-д 5 бөмбөг оруулсан гавьяатай. Тэр эцсээ хүртэл үзэлцсэн, жинхэнэ ахмад. Роналдо хамаг хүчээ дайчилсан” гэж мэдэгдлээ. Харин Португалийн шигшээ багийн хагас довтлогч Жоау Пальинья “Манайх Бельгиэс илүү олон момент үүсгэж чадсан. Эхний таймд бид тоглолтыг сайн хянаж байсан ч гоол алдлаа. 2-р таймд гоол хийх боломж гарсан ч Азын тэнгэр айлын талд байлаа” гэжээ. “Бидний ганц зорилго ялалт байсан... Гэвч бид толгойгоо өндөр өргөн явж байна, бид ямар орныг төлөөлж буйгаа мэднэ, бид юу чадахыг ч мэднэ” хэмээн хамгаалагч Рубен Диаш ярилаа. 
Ялалт байгуулсан Бельгийн шигшээ багийн ерөнхий дасгалжуулагч Роберто Мартинес “Португалийн шигшээ баг ер бусын туршлагатай, гайхамшигтай тоглодог. Бид итгэмээргүй сайн төвлөрч чадан маш сайн хамгаалж гоё гоол оруулж чадлаа” гэж мэдэгдэв. Гэхдээ энэ тоглолтын үеэр хагас хамгаалагч Кевин Де Брейне, Эден Азар нар бэртэл авчээ, иймээс дараагийн тэмцээнд оролцохгүй аж. Энэ нь Бельгийн шигшээ багийн амжилтад таагүй нөлөөлөх нь гарцаагүй.