Image description
Филиппин улсад Цар тахлын нөхцөл байдал хүндэрсэнтэй холбоотойгоор тус орны Ерөнхийлөгч Родриго Дутерте шинэ санаачилга гаргасныг “PTV” төрийн телевиз дамжуулав. “Коронавирүсийн вакцин хийлгэхгүй, вакцинжуулалтыг эсэргүүцдэг хүмүүст хатуу арга хэмжээ авах ёстой. Ковидын эсрэг ямар ч эм вакциныг олон иргэн хүлээн зөвшөөрөхгүй байгааг энд онцолж байна. Иймээс тэдний гэрт очоод унтаж байх үед нь вакцин тарих хэрэгтэй. Би өөрөө энэ вакцинжуулалтын бүлгийг тэргүүлэхэд бэлэн. Намайг буруу ойлгох хэрэггүй, улс оронд хямралт Онц байдал үүсчихлээ” гэж Филиппиний Ерөнхийлөгч Дутерте 7 хоног тутмын хэвлэлийн хурал хийхдээ мэдэгджээ. Тэр бүү хэл мань эр вакцин хийлгэхээс татгалздаг хүмүүсийн жагсаалт гаргах үүргийг Дотоод хэргийн яам, орон нутгийн удирдах байгууллагад өгнө гэж сүрдүүлэв. “Хэрэв чи вакцинжуулалтад хамрагдахыг хүсэхгүй гэвэл би чамайг баривчилж тарьчихна шүү. Та нар бол хорлон сүйтгэгчид, үүнээс болж бид зовж шаналж байна. Та нар л нөхцөл байдлыг улам хүндрүүлдэг. Хэрэв вакцин хийлгэхгүй гэвэл Филиппинээс явцгаа, Энэтхэг рүү эсвэл өөр тийшээ Америк руу яв. Харин энд байгаа цагт та нар бол вирүс тээгчид, иймээс тариулцгаа. Вакцинаас татгалздаг хүмүүс үнэндээ тэнэгүүд, тэд вирүс тээж нэг газраас нөгөөд очиж бусдыг халдврлуулдаг. Та нар ингээд татгалзаад байвал би гахайн вакцин- ивермектин та нарт хийчихнэ шүү, энэ үнэхээр вирүсийг алдаг, бас та нарыг ч гэсэн” хэмээн Филиппиний тэргүүн мэдэгджээ. Тэрбээр төгсгөлд нь Цар тахлын үед хувийн хамгаалалтаа хэрэглэж олон нийтийн газарт хоорондын зайг баримтлахыг ард иргэддээ сануулав. Ерөнхийлөгч Дутерте өмнө нь ч шоконд оруулам мэдэгдэл хийж, “Хөл хорио зөрчсөн иргэдийг шийтгэх хуулийн зүйл анги би хайж байгаа, жишээ нь олон нийтийн арга хэмжээнд оролцвол шоронд хорино.... Коронавирүсийн халдвар авсан хэрнээ Цар тахлын тухай хуулийг санаатай зөрчин бусдад халдвар тараавал хүн алсан гэж үзэх боломжтой” гэж хэлсэн удаатай. 
Өнөөдрийн байдлаар Филиппинд 23 сая гаруй хүн вакцинжуулалтад хамрагдсан. Гэсэн хэдий ч эрх баригчид энэ үзүүлэлтийг нэмэгдүүлэх ёстой гэж үзээд, 2021 оны сүүл гэхэд 70 сая иргэнээ вакцинжуулах зорилт тавьжээ. Энэ улсад нийт 1,36 сая хүн коронавирүсийн халдвар авч 1,28 сая гаруй нь эдгэрч 23,7 мянган өвчтөн нас барсан.