Image description
Сүүлийн үед вакцинжуулалтын түвшин өндөр орнуудад коронавирүсийн халдварын тоо өсч байна. Жишээ нь Сингапурт хүн амын 80% нь бүрэн вакцинжуулагдсан хэрнээ 10-р сард хоногт 3000 халдвар илэрч байгаа. Англи улсад хүн амын 66% гаруй нь 2 тунгаа хийлгэсэн хэрнээ 10-р сарын дундуур хоногт шинээр 45 мянга гаруй халдвар бүртгэгдэх болсон. Энэ бол тус оронд сүүлийн 3 сард үзэгдээгүй өндөр үзүүлэлт. Америк хүн амынхаа 56%-д 2 тун вакцин тарьсан хэрнээ сүүлийн өдрүүдэд 90-99 мянган халдвар шинээр илэрч байна. Вакцинжуулалтын түвшин өндөр орнуудад ковидын өвчлөл өсч буй шалтгааныг эрдэмтэд дараах байдлаар тайлбарлажээ
Женевийн их сургуулийн даяаршлын эрүүл мэндийн хүрээлэнгийн захирал, вирүс судлаач Антуан Флао “Коронавирүсийн эсрэг вакцинууд бол өндөр түвшний хамгаалалтай, эмнэлэгт хэвтэх ба нас барахаас сэргийлнэ. Гэхдээ 90%-ийн үр дүн гэдэг бол мэдээж 100% биш учраас энэ цөөхөн хувь л хүн амын ихэнх нь халдварын давалгаанд өртсөн үед ийм өндөр тоонд хүргэж байж болзошгүй. Тэгээд ч дээр дурдсан орнуудад хэдий вакцинжуулалтын түвшин өндөр ч зуны улиралд зөвхөн вакцин тарих гэсэн стратеги барьснаас болж одоо өвчлөл ийм өндөр гарч байна. Яагаад гэвэл дээрх орнуудтай адилхан вакцинжуулалтын түвшинтэй орнууд буюу Испани, Португали, Итали, Франц, Швейцарь, Дани, Финлянд, Швед, Норвег зэрэг улсууд олон, нэмэлт арга хэмжээг зэрэг авч явсан юм. Тухайлбал, вакцинжуулалтын паспорттой болох, нийтийн тээвэр ба өрөө тасалгаанд маск зүүх, тестийн бодлого баримтлах, хилийн хатуу хяналт. Түүнчлэн, өрөөний агааржуулалтад их анхаарал хандуулж байна” хэмээн мэдэгдлээ.