Image description

Олон төрлийн аялал жуулчлал бий, эмчилгээний болон худалдаа наймаа, спорт, наран шарлага, секс, архины гэх мэт. Эрүүл мэндийн үйлчилгээ муу орны иргэд анагаах салбар илүү хөгжингүй, чанартай улс руу очиж эмчлүүлэх нь элбэг. Тухайлбал, үс суулгахаар Турк рүү, шүдээ эмчлүүлэхээр Америк, Армян руу цувдаг. Харин одоо Цар тахлын үед вакцины жуулчлал гарч ирлээ. Энэ удаад хүмүүс амарч зугаалах гэж биш зүгээр л амьд үлдэхийн тулд ийм жуулчлал хийж байна. Дэлхийн зарим оронд вакцинжуулалт эхлээгүй, иймээс мөнгөтэй бөгөөд овсгоотой иргэд дэмий хүлээж байхаар вакцины тарилга хийж байгаа Хөл хориогүй, хязгаарлалтгүй газар луу өөрсдөө очих болжээ.

Өнөөдөр Америк даяар вакцины жуулчлал өргөн тархаад байна. Зарим мужид тарилга хийлгэх гэж олон зуугаараа оочир дараалалд зогсч хүлээх шааардлага гарч байгаа учраас америкчууд өөр муж руу машинаар эсвэл онгоцоор нисч очин вакцинаа хурдан хийлгэж эхэлжээ. Жишээ нь Калифорний оршин суугчид өдгөө Флорид руу очиж вакцин тариулж байгаа. “Вакцины жуулчид”-ыг ихэнх нь тахал тарааж, эмх замбараагүй байдал үүсгэлээ гэж буруутган зэмлэдэг. Харин ийм жуулчид очсон орон нутгийн (тэр тусмаа хөдөөгийн жижгэвтэр хотын) эрх баригчид тэднийг баяртай угтан авсаар л. Вакцины жуулчид яг жирийн жуулчин шиг их мөнгөтэй ирдэг тул орон нутгийн эдийн засагт хөрөнгө оруулаад буцах нь ойлгомжтой. Ялангуяа зочид буудал, кафе ба зоогийн газрын эзэд үүнд сэтгэл хангалуун байгаагаа илэрхийлж байна.
Гадаадынхан коронавирүсийн эсрэг тарилга хийлгэхээр Орос руу цувж эхэлжээ. Европын зарим оронд вакцинжуулалт эхлээгүй эсвэл удаан явагдсанаас болоод иргэд нь Орос руу ирж “Спутник V” вакцин тариулах нь ихэслээ. Туркийн аялал жуулчлалын нэг агентлаг “вакцины аялал”-ын тасалбараа 1099 еврогоор үнэлжээ. Виза авах шаардлагатай бол 220 доллар нэмэгдэнэ. Жуулчинд Стамбулаас Москва орох, буцах тасалбар өгч 2 удаагийн тарилгыг эмнэлэгт хийлгэх эрх олгоно, дээр нь тус бүр 24 цаг хотоор аялж зугаалан түүхэн дурсгалт газруудаар явах боломжтой. Гэхдээ Орос өчигдрөөс Турктэй хилээ хаасан тул одоо Белорусс зэрэг гуравдагч орноор дамжин очих бололтой. Молдавт ийм тасалбар 1200 евро хүрчээ. Германд мөн ийм аялал хөгжиж байна, жуулчин 21 хоног Москвад байж тарилга хийлгэнэ, төлбөр 3000 евро.
Гэхдээ Орос зөвхөн өөрийн иргэдээ вакцинжуулж байгаа бөгөөд тарилга хийхийн өмнө заавал иргэний үнэмлэх шаарддаг, иймээс вакцины жуулчид нууцаар, хуурамч бичиг баримт бүрдүүлж тарилга хийлгэж байгаа тухай тус орны ХМХ сэрэмжлүүлж байна. Харин гадаадад амьдардаг орос паспорттой иргэдэд шууд, үнэ төлбөргүй вакцин хийдэг тухай Оросын эрх баригчид мэдээлсэн. Ийм иргэдэд зориулсан “вакцины жуулчлал” хөтөлбөрийг хувийн агентлагууд хэрэгжүүлж байгаа. Үнэ 700 евро (2 удаа ирж очно, 3 хоног) эсвэл 1500 евро (21 өдрийн ганц тасалбар). Гэхдээ зөвхөн хувийн компаниуд ингэж мөнгө олж байгаа байдал удаан үргэлжлэхгүй бололтой. ОХУ-ын эрх баригчид 7 сараас албан ёсны ийм хөтөлбөр хэрэгжүүлэхээр төлөвлөж байгаа аж. Яагаад гэвэл, вакцины жуулчлал ирээдүйд Оросын нэр хүндэд эерэгээр нөлөөлж,  “зөөлөн хүч”-ний нэг хэсэг болно гэж оросууд найдаж байна. Оросын нэг онцлог нь вакциныг эмнэлгийн байгууллагуудаас гадна хөдөлгөөнт цэгээр, мөн их дэлгүүр, театр, онгоцны буудал зэрэг газарт ч тарьж байгаа. Дэлхий даяар аюулгүй, өндөр үр дүнтэй гэж алдаршсан “Спутник V”-гээс гадна одоо “ЭпиВакКорона”, “КовиВак” гэсэн 2 вакциныг Орос хүн амдаа тарьж эхэлжээ. "Спутник V" вакциныг одоогоор дэлхийн 60 орон бүртгэж авсан,  эдгээр орны хүн ам нийлээд 3 тэрбум хүрч байна.