Португал улсын хөлбөмбөгчин Криштиан Роналдогийн хэвлэлийн хурлын талаар “Record” сонин нийтэлжээ. “Месси бид хоёрын өрсөлдөөн дууссан. Энэ үнэхээр сайхан сөргөлдөөн байлаа. Криштианыг хайрладаг хүн заавал Мессийг үзэн ядах албагүй. Бид хоёулаа сайн тоглогч, бид хөлбөмбөгийн түүхийг өөрчилсөн улс. Одоо ч үүнийгээ үргэлжлүүлж байгаа. Хамгийн гол нь биднийг даян дэлхий хүндэтгэдэг.... Европт эсвэл гадуур тоглож байгаагаас үл хамааран тэр өөрийнхөөрөө, би ч өөрийнхөөрөө.  Түүний бүх юм сайн сайхан байгааг би мэднэ, би ч бас ялгаагүй. Бид тайзыг 15 жилийн турш хуваалаа. Мэдээж бид найз гэж би хэлэхгүй, гэхдээ бид мэргэжилт нэгтнүүд бөгөөд бие биеэ хүндэлдэг” хэмээн Роналдо ярьжээ. 38 настай Роналдо бол “Алтан бөмбөг” шагналыг 5 удаа хүртсэн, Аваргуудын Лигэд 5 удаа, мөн Европын аварга, Үндэстний Лигийн ялагч. Тэрбээр Английн “Манчестер Юнайтед”, Италийн “Ювентус”, Португалын “Спортинг” клубт тоглож байгаад 2022 оны 12 сараас Саудын Арабын “Аль-Наср” багт шилжин очсон билээ. 
Роналдо 9 сарын 2-нд бас нэг дээд амжилт тогтоов. Тэрбээр энэ өдөр албан ёсны тэмцээнд 850 дахь гоолоо оруулсан. Харин Месси 818 гоолоор дэлхийд хоёрт жагсдаг. 
Сонирхуулахад, Роналдо сүүлийн 19 жилд анх удаа “Алтан бөмбөг” шагналд нэр дэвшсэнгүй хэмээн “France Football” дамжууллаа. Харин энэ шагналд тодорхойлогдсон 30 хөлбөмбөгчний дунд Аргентины довтлогч Лионель Месси бий. Тэр 7 удаа энэ шагналыг авч дээд амжилт тогтоосон юм. Месси саяхнаас Америкийн “Интер Майами” багт тоглож эхэлсэн билээ.