Оросын уран гулгагч, 19 настай Ксения Синицына Самара хотод явагдсан “Гран При” тэмцээний 5-р шатанд алдартай олон тамирчныг ардаа орхиж ялжээ. Тэрбээр энэ ялалтын дараа л хугархай хөлтэй 10 хоног гулгаснаа мэдсэн тухай “Sport24” мэдээлэв. “Хөл хугарсан гэдгийг сонсоод би үнэхээр “мэл гайхаж цэл хөхөрсөн. Эмч анх буруу онош тавьсан байсан. Энэ бол зүгээр хөх няц болж, аюултай юм алга гэж надад эмч хэлсэн юм. Сэтгэл санааг тэгж чиглүүлсэн болохоор... яваад л байсан. Үсрээд буух үед жаахан өвдөж эмзэглэдэг байв, гэхдээ л ноцтой юм алга гэсэн гэж бодон сургуулилтаа хийж байлаа....  Би өвдөлтийг тэсвэрлэж 10 хоногийн турш дасгал сургуулилтаа хийж байлаа. Сүүлдээ манай дасгалжуулагч "10 хоног өвдөнө гэдэг нэг л бишээ, дахиж эмчид үзүүлэх хэрэгтэй" гэв. Гэтэл хөл хугарсан байжээ. Би яаж гулгаж байв? Бас яаж үсэрч байсан юм бол? Энэ бүхэн хөл, ер нь миний эрүүл мэндэд ноцтой хохирол учруулж болзошгүй байсан. Хугарсан яс буруу барьцалдаж эдгэсэн бол яана? Азаар бүх юм гайгүй өнгөрлөө. Би Самара хотод ирсэндээ баяртай байна... Энд ялсандаа сэтгэл маш их догдолж байна. Баяр хөөр багтаж ядан... инээмсэглэлээ барьж дийлэхгүй нь ээ. Энэ үнэхээр үгээр хэлшгүй мэдрэмж. Би маш их баяртай байгаа” гэж Ксения Синицына сурвалжлагчид ярилаа. 
Тэрбээр одоо биеийн тамирын дээд сургуульд сурдаг, ирээдүйд дасгалжуулагчаар ажиллахыг хүсдэг аж. Түүний хобби нь бялуу хийх. Ксения ярилцлагын төгсгөлд “Хамгийн гол нь эрүүл мэнд шүү! Аз амжилтыг бүгдэд ерөөе. Уран гулгалтын тэмцээнээ үзээрэй” гэж хэллээ. 
#МЦогзолмаа орчуулав.