Америкийн сагсан бөмбөгчин Кристофер Блейк 3 жилийн өмнө анх манай эх оронд иржээ. Тэрбээр 35 настай, 195 см өндөр. Блейк өмнө нь АНУ-ын Детройтын Коллежид сагсан бөмбөг тоглож байсан, 2012 онд Детройтын Мерси их сургууль төгсчээ. Тэрбээр Бразил улсын “Сорокабана”, “ABA”, мөн Сальвадорын “Кесалтепеке”, “Агила”, “Метапан”, “Брухос”, “Сан-Сальвадор”, Никарагуа, одоо Монгол гэх зэргээр дэлхийн 3 тивийн 6 оронд сагс тоглож үзсэн аж. Кристофер Блейк Монголд ирээд Сагсан бөмбөгийн Дээд лигийн 4 багт тоглосон ба одоо “Бишрэлт Металл” багийн тамирчин болжээ.
Блейк Монгол Улсын иргэн болох өргөдлөө Ерөнхийлөгч У.Хүрэлсүхэд өгчээ. “Би Монголын сагсан бөмбөгт дуртай, бас цаг агаар, байгаль орчин их таалагддаг. Хэрэв Ерөнхийлөгч миний хүсэлтийг ёсоор болговол би Монголын нэрийн өмнөөс олон улсын тэмцээнд оролцохыг хүсдэг. Мөн өөрийн туршлагаасаа монгол залуус, хүүхдүүдтэй хуваалцаж сагсан бөмбөгийн хичээл заах бодолтой байна” хэмээн алдартай тамирчин Кристофер Блейк ярилаа.