Оросын уран гулгагч Камила Валиева нас бие гүйцсэний баяраа тэмдэглэв.  Түүний төрсөн өдөр шөнийн 12 цагаас эхэлсэн гэж болно. Камилагийн шүтэн бишрэгчид гэрийн гадаа нь ирж салют буудуулжээ. Энэ үеэр Лёва нохой нь айж зугтаасан тул Камила болон гэрийнхэн нь бараг 5 минут хайж байж олсон гэнэ. Тэрбээр шууд 3 хэлээр фанатууддаа хариу бичжээ, орос ба англи, хятад. “Баярлалаа, эрхэм фанатууд минь. Шөнийн 12 цагаас л баярын мэнд хүргэж сайхан ерөөл илгээж буйд талархаж байна” хэмээн Камила интернэт дэх хуудсандаа хариуллаа. Тэрбээр төрсөн өдрийнхөө өглөө Оросын 1-р сувагт ирж ярилцлага өгчээ. “Ирээдүйн тухайд яривал, нөхөрт гарахаа одоогоор азнана. Би жолооны үнэмлэх авахыг маш их хүсч байгаа. Мөн дунд сургуулиа төгсч шалгалтаа өгнө. Түүнчлэн бие даан тусдаа байранд амьдрахыг хүсдэг” хэмээн Камила ярилаа. Тэрбээр удахгүй нилээд хэдэн шоунд хөтлөгчөөр оролцох болсноо энэ үеэр дуулгав. 
 “WADA”-н шийдвэрийн улмаас Камила Валиева энэ улиралд гулгаагүй. Гэхдээ Камила 2025 оны сүүлээр уран гулгалтын ертөнцөд буцаж ирэх ба 2026 онд Италийн Миланд болох Олимпийн наадамд оролцохоор төлөвлөжээ.