Дэлхийн алдартай хөлбөмбөгчин Критиан Роналдо Саудын Араб улсад болсон нэгэн тэмцээний үеэр эвгүй дохио зангаа хийж бөөн хэл аманд өртлөө. Түүний “Аль-Насра” баг нь “Аль –Хиляль” багтай тоглож 0:2 харьцаатай ялагджээ. Роналдо талбайгаас гарч явах үед цэнгэлдэхэд ирсэн хөгжөөн дэмжигчид түүнийг доромжилж Лионель Мессийн нэрийг хашгирч эхлэв. Месси мэдээж Роналдогийн гол өрсөлдөгч билээ. Үүний хариуд Роналдо салтаагаа барьж аван эвгүй үйлдэл хийсэн байна. Энэ бичлэг интернэтээр тарсны дараа Саудын Арабын өмгөөлөгч Нуф бинт Ахмед Шүүхэд гомдол гаргалаа. "Хөлбөмбөгчин Роналдо уг нь хөгжөөн дэмжигчдийн өдөөн хатгалгын хариуд ийм муухай үйлдэл хийх ёсгүй байсан юм, Түүнийг шийтгэж манай орноос шууд хөөж гарга гэж шаардаж байна" хэмээн өмгөөлөгч Шүүхэд өгсөн гомдолдоо дурджээ. 
Саудын Араб улс их чанга хуультай, гадаадын иргэд хэрэв эвгүй муухай авир үйлдэл гаргасан бол  шууд хөөж гаргадаг билээ. Харин интернэтийн зарим хэрэглэгч шууд Роналдог өмөөрч “Одоо бүр олон нийтийн өмнө биеэ маажиж ч болохоо болио юу” гэж хошигнож байна. Сүүлд ирсэн мэдээгээр Саудын Арабын Хөлбөмбөгийн холбоо Роналдог ямар нэг байдлаар шийтгэхгүй гэж мэдэгджээ.