Image description
Коронавирүсийн Цар тахлын улмаас дэлхийд анх удаа экс Эрүүл мэндийн сайдыг эрүүгийн хэрэгт татсан тухай “France 24” мэдээллээ. Энэ бол төр засгийн өндөр албан тушаалтныг “Covid 19”-тэй холбогдуулан хуулийн хариуцлага хүлээлгэхээр мөрдөн байцааж буй анхны тохиолдол болов. Францын Прокурорын газар өөрийн орны экс Эрүүл мэндийн сайд, 58 настай Аньес Бузиныг “Ард иргэдийн амь насанд аюул учруулсан, коронавирүсийн аюулыг дутуу үнэлж Цар тахлыг дэгдэлтийг урьдчилан харж чадаагүй” хэмээн буруутгаж байна. Мөрдөх ажиллагааны хүрээнд мөн Засгийн газрын алхам үйлдлийг үнэлж дүгнэлт өгөх гэнэ. Ойрын долоо хоногт өнөөгийн Эрүүл мэндийн сайд Оливье Вераныг дуудаж байцаалт авах ажээ. Экс сайд Аньес Бузин “Энэ бол миний хувьд тайлбар тавьж үнэнийг тогтоох сайхан боломж. Одоо хүртэл үргэлжилж буй эрүүл мэндийн салбарын даяаршсан хямралыг даван туулахад Франц орныг бэлдсэн Засгийн газрын болон миний нэр хүндийг унагах, алхам үйлдлийг буруутгаж гүтгэх гэсэн оролдлогуудыг хэрхэвч тэвчихгүй” гэж Шүүх дээр мэдэгдсэнийг “France News Live” дамжуулав. 
Аньес Бузин бол 2017 оны 5-р сараас 2020 оны 2-р сар хүртэл Францын Эрүүл мэндийн сайдаар ажилласан ба энэ улсад коронавирүсийн халдвар ын эхний тохиолдлууд бүртгэгдсэний дараа огцорчээ. Тодруулбал, 2020 оны 1-р сард Францад коронавирүсийн халдварын 3 тохиолдол илэрч 2 сарын 14-нд ковидтой анхны өвчтөн нас барсан. Үүнээс 2 өдрийн дараа Аньес Бузин сайдын суудлаа өгчээ, гэхдээ сонгуульд оролцох гэж огцорсон юм байна. Тухайн үед сайд Аньес Бузин “Шинэ өвчин Францад тархах магадлал маш бага. Хятадаас коронавирүсийн халдвар нэвтэрсэн гэсэн баримт байхгүй, мөн хүн амын дунд өргөн тархана гэж үзэхгүй байна” гэж мэдэгдсэнийг “Euronews” эргэн сануулав. 
Франц улс өнөөдөр музей, кино театрт тусгай “санитарын үнэмлэх”-ээр нэвтрүүлж байгаа. Энэ үнэмлэх бол вакцин тариулсан эсвэл коронавирүсийн тест өгч сөрөг үр дүнтэй, эсвэл саяхан ковидоор өвчилсний нотлох баримт юм. Нэмж өгүүлэхэд, Аньес Бузин 2021 оны 1-р сараас Дэлхийн эрүүл мэндийн байгууллагын Женев дэх офист ажиллаж байгаа. Өнөөдрийн байдлаар Францад 6'877'825 халдвар илэрч 115'362 хүн нас баржээ.