Image description

Өнөөдрийн сонссон чихэнд чимэгтэй үг бол “Нэг сая дахь иргэн вакциндаа хамрагдлаа” гэдэг мэдээ байлаа. Хүн бүр дор бүрнээ хичээгээд иргэнийхээ үүргийг ухамсарлаад улсаараа Ковидын ялагч болоход тун ойрхон боллоо. Энэ нь нэг талаараа Монгол улсын Засгийн газраас ард иргэдээ вакцинжуулах ажлын үр дүнтэй зохион байгуулах тал дээр онцгой анхаарч ази тивдээ тэргүүлж эхэлсний үр дүн. Нөгөө талаар Засгийн газраас вакцинжуулалтыг үр дүнтэй зохион байгуулж, нэгдсэн бодлого зохицуулалт, заавар зөвлөмжөөр тасралтгүй хангаж ажилсны үр дүнд нэг сая иргэнээ вакцинд хамруулж чадлаа. Чамлахаас чанга атга гэдэг дээ.Бүгдээрээ хаа хаана зүтгэвэл болохгүй, бүтэхгүй зүйл гэж алга.

Дэлхийн ихэнх улс орнуудад вакцинжуулалтыг хурдан нэвтрүүлэх нь зах зээлээ бүрэн нээж, эдийн засгаа сэргээх нь нэн тэргүүний зорилт болгочихоод байна. Монгол Улсын хувьд  18 насанд хүрсэн 2 сая 160 мянган иргэнээ вакцинжуулах хэрэгтэй. Вакцин боловсруулсан улс орнууд эн тэргүүнд өөрийн орны иргэдийг вакцинжуулахад хамруулахыг эрмэлзэж, төр засгийн бодлогын тэргүүлэх чиглэлээ болгон зарласан. Ингэснээр вакцин үйлдвэрлэдэггүй, хөгжүүлдэггүй ядуу буурай орны иргэд дарааллын сүүлд зогсох ёстой болсон. Монгол Улсын хувьд ч 2-оос доошгүй удаа иргэдээ вакцинд хамруулж аль нэг гадаад гүрнээс хамаарах “шинэ” төрлийн хамаарлыг гүнзгийлүүлэх эрсдэлд хүрч магадгүй гэсэн болгоомжлол бий болж, иргэдийн вакцинд үл итгэх, итгэхгүй хардах явдалд ч өргөжсөн. Хуйвалдааны онолоор вакцин нь үндэсний ген фондод аюул занал учруулна, үндэс угсаагаар нь аймаглан устгах биологийн зэвсэг гэх мэт цуу тарж, ард иргэдийг айдас хүйдэст автуулан улмаар вакцинаас татгалзахад хүргэж халдварын аюул заналыг улам өргөжүүлэх эрсдэл нэмэгдсэн ч улс орнууд эн тэргүүнд вакцинжуулах хүн амаа тодорхойлж, вакциныг хугацаа алдалгүй тэгш хүртээх арга замаа тогтоож зорилтот бүлгийн хүн амыг хамгаалахад онцгой анхаарах нь чухал. Нөгөө талаар вакцинд эргэлзэх эргэлзээг арилгаж илүү олон  хүнийг вакцинжуулахын тулд найдвартай эх сурвалжаар дамжуулан, зорилготой, тодорхой, үнэн бодит мэдээлэл түгээх, вакцинжуулах цэгийг аюулгүй, сэтгэлд ойр, хүрч очиход төвөггүй газарт байгуулах зэрэг тодорхой ажлуудыг хийж хэрэгжүүлж байгаа Засгийн газрын үйл ажиллагааг иргэд бид дэмжих ёстой.Зүгээр л энгийн жишээ татаад үзье л дээ. АНУ зэрэг өндөр хөгжилтэй орнуудад 100 хүн тутамд дунджаар 20 тун вакцин ногдож байгаа бол Ази, номхон далайн бүс нутгийн орнуудад 100 хүн тутамд 2 тун вакцин ногдож байна. Өнөөдрийг хүртэл зарим улс орнууд цаашлаад болон дэлхий дахинд вакцины тэгш хүртээмжийг бий болгох асуудал ч хүндрэлтэй хэвээр л байна. Хөгжиж буй орнуудад вакцинжуулалтыг илүү сайн нэвтрүүлэхийн тулд тухайн улс орны Засгийн газрын бодлого стратеги чухал. Оновчтой бодлого боловсруулснаар вакцины зөвшөөрөл олгох, түгээх, аюулгүй зах зээлийг бий болгоход чиглэсэн шийдвэр гаргах үйл явцыг  зохистой болгох боломжтойг Засгийн газрын авч хэрэгжүүлж буй үйл ажиллагаа харуулж байна. Хамгийн сүүлийн үеийн мэдээллэр хүн амынхаа ихэнх хувийг вакцинжуулсан Англид Ковид-19 халдварын өвчлөл ингэж буурчээ


Бид ч бас бусдаас дутах учиргүй. Жоохон л хичээчихвэл Маскгүй зун тун ойрхон байна. Улсаараа Ковидын ялагч байя