Image description
Энэтхэгт одоогоор 20 сая гаруй хүн коронавирүсийн халдвар аваад байна. Хоногт шинээр 300 мянга гаруй тохиолдол илэрч байгаа, сүүлийн 24 цагт гэхэд 350 мянга гаруй. Орон нутгийн эмнэлгүүд ачааллаа даахаа больж, эм тариа ба хүчилтөрөгчийн хомсдол үргэлжилсээр л. Иймээс сайн дурын ажилтнууд гудамжинд майхантай лагерь байгуулж эмнэлэгт үзүүлэх гээд чадахгүй байгаа хүмүүст тусалж эхэлжээ. Тэд үхэл амьдралын заагт ирсэн хүмүүсийг шууд гадаа хүчилтөрөгчийн аппаратанд холбон амийг нь аварч байна. 20 минут хүрэхгүй л шинэ шинэ өвчтөнүүд ирсээр байгаа тухай сайн дурынхан мэдээлэв. “Хүчилтөрөгчийн хомсдолоос болж хэн ч үхэх ёсгүй. Өнөөдөр зөвхөн энэ л сая сая хүмүүст маш их хэрэгтэй байна. Хэрэв өвчтөнүүдэд хүчилтөрөгч хүрч чадвал тэд амьд үлдэх боломжтой. Чухам ийм учраас бид ийм хүчилтөрөгчийн лагерийг байгуулсан, ямар ч үнэ төлбөргүй. Бид хүмүүсээс ганц ч пени авахгүй, өвчтөнүүдийн эмчилгээний бүх зардлыг өөрсдөө дааж байгаа” гэж сайн дурын ажилтнуудын нэг Гурприт Сингх Рамии ярилаа. 
Дэлхийн олон улс орон энэ хэцүү үед Энэтхэг оронд тусалсаар байна. Гадаад орнуудын илгээсэн хүмүүнлэгийн тусламж буюу хүчилтөрөгчийн баллон, амьсгалын аппарат, эмнэлгийн монитор, вирүсийн эсрэг эм зэргийг ачсан онгоцууд ар араасаа энэ улсад бууж байгаа. Оросын “Спутник V” вакцин 5 сарын 1-нд Энэтхэгт иржээ. Дашрамд дурдахад, Энэтхэг удахгүй жилд 850 сая тун орос вакциныг бие даан үйлдвэрлэх гэж байна.