Хятадын тэргүүн Си Жин Пиний Америк дахь айлчлал эхэллээ. 11 сарын 14-нд Калифорний Сан-Франциско хотын нисэх буудал дээр Хятадын онгоц газардлаа. Түүнийг Америкийн Сангийн сайд Жанет Йеллен, Калифорни мужийн амбан захирагч Гэвин Ньюс, Хятадад суугаа АНУ-ын Элчин сайд Николас Бернс тэргүүтэй албаны хүмүүс угтан авчээ. Си дарга өөрийн улсын “Hongqi” (Улаан туг) лимузинд суугаад хөдлөв. Си дарга лхагва гарагт АНУ-ын Ерөнхийлөгч Жо Байдентай уулзаж дараа нь Ази-Номхон далайн эдийн засгийн хамтын ажиллагааны (APEC) саммитад оролцоно. 
“APEC”-т 21 орон багтдаг, дэлхийн ДНБ-ий 54%, худалдаа наймааны 44% энэ байгууллагад ногддог. Манай гарагийн хүн амын 40% нь “APEC”-н орнуудад амьдардаг аж. 
Хачирхалтай нь, Си даргыг ирэхээс хэдхэн цагийн өмнө АНУ-ын Төрийн нарийн бичиг Энтони Блинкен “APEC”-н дээд хэмжээний уулзалтын хүрээнд Гадаад харилцааны сайд нартай уулзахдаа Хятадыг шүүмжлээд авчээ. “Аливаа эдийн засгууд өөрсдийн, чөлөөт замаар замнаж хүмүүс болон бараа таваар, үзэл санаа эрх чөлөөтэй бөгөөд хуулийн дагуу байх тийм бүс нутгууд байсаар байх болно гэдэгт АНУ итгэдэг” хэмээн тэрбээр хэлсэн юм. “Блинкен хэдий Хятадыг нэр цохоогүй ч тус улсын эсрэг бодлоо далд утгаар дахиад илэрхийллээ. АНУ л сүүлийн жилүүдэд Хятадыг байнга шүүмжилж, Энэтхэг-Номхон далайн бүс нутагт жижиг орнуудыг айлган сүрдүүлдэг мөн манай тогтоосон дүрэм журмыг устгахыг оролддог гэж буруутгаж ирсэн билээ” хэмээн тоймчид онцлон тэмдэглэв. Харин АНУ-ын Үндэсний аюулгүй байдлын зөвлөлийн стратегийн харилцааны зохицуулагч Жон Кирби “Хятад хэрэв одоо Украиныг, Зеленскийг дэмжвэл АНУ-д их тус болно...” гэж мэдэгдлээ. 
#МЦогзолмаа орчуулав.