“2023 оны эхний 11 сарын мэдээллээс үзэхэд Хятад улс дэлхийн авто машины экспортыг тэргүүлжээ. Энэ нь юуны өмнө хятадуудын Орос ба Мексикт нийлүүлсэн авто машины тоо эрс өссөнтэй холбоотой” гэж Японы “Nikkei” сонин бичжээ.
Харин Хятадын Авто машин үйлдвэрлэгчдийн холбоо энэ талаар “2023 оны 1-11 сарын хугацаанд гадаадад нийлүүлсэн авто машины өсөлт жилийн дүнгээр бодоход 58,4% хүрсэн. Тодруулбал, Хятад улс нийт 4,41 сая авто машин экспортолсон. Харин Япон улс энэ хугацаанд манайхаас 400 мянгаар цөөн машин экспортод гаргажээ” хэмээн мэдэгдэв. Хятадаас Орост гаргадаг авто машины тоо 7 дахин нэмэгдэж 730 мянгад хүрлээ. Мөн Мексик рүү экспортолсон авто машин 30% нэмэгдэж 330 мянга давсан. Хятадууд одоо Мексикээр дамжуулан АНУ, Канадын зах зээлд гаргахыг эрмэлзэж байна. 
Түүнчлэн хятадууд өөрийн зах зээлээс “Toyota Coaster”-г шахан гаргахын тулд люкс ангиллын “Hongqi Guoyue” автобус бүтээжээ. Намын элитүүд, төрийн албаны ажилтнууд, аялагч жуулчдад зориулсан тус автобусыг “FAW” төрийн өмчит автоконцерн 2024 оны 2 сараас үйлдвэрлэнэ. 2 сараас элитүүдэд нийлүүлэх ба 3 сараас үнийг тогтоож бусдад зарна. “Hongqi Guoyue” автобус 3 хувилбартай: бизнес, люкс ба флагман. 17-28 хүний багтаамжтай, хэмжээ 7295 х 2090 х 2785 мм. 292 м/х 3л бензин хөдөлгүүртэй, ширээ болон аяганы болон шүхрийн тавиур, 220В розетка, хөргөгчтэй. Дээд хурд 130 км/ц, түлшний зарцуулалт 100 км-т 16 литр.