Аллага үйлдсэн этгээд “COVID 19”-н улмаас стресст өртсөн байсныг харгалзаж үзлээ, энэ бол ял хөнгөрүүлэх хүчин зүйл хэмээн Итали улсын Дээд Шүүх шийдвэрлэсэн тухай “Il Messaggero” сонин мэдээллээ. Тус шүүх насан туршид хоригдох ял авсан Мессина мужийн оршин суугч Антонио Де Пачегийн давж заалдах өргөдлийг авч хэлэлцээд ялыг нь цуцалжээ. 2020 оны 3 сард коронавирүсийн Цар тахлын үеэр Сицилийн эмнэлгийн асрагч залуу Антонио Де Паче өөрийн найз хүүхнийг боож амийг нь хөнөөсөн хэрэгтээ насан турш хоригдох ял авсан юм байна. Антониогийн найз хүүхэн 27 настай Лорена Куаранта хэдэн долоо хоногийн турш хоолой өвдлөө гэж гомдолложээ. Антонио түүнийг коронавирүсийн халдвар авсан гэж сэжиглэн эцэг эх рүүгээ явахаар шийдсэн. Тухай үед Итали даяар Хөл хорио тогтоосон байв. Бүсгүй түүнийг үлдээч гэж гуйсан боловч залуу зөрүүдэлж улмаар бөөн хэрүүл маргаан дэгдэв. Энэ хэрүүлийн үеэр Антонио түүний хоолойг боож хөнөөжээ. Тэр дараа нь өөрийн амийг хорлох гэж 2 удаа оролдсон, гэвч бүтэлгүйтэв. Антонио эцэстээ цагдаад очиж хэргээ хүлээсэн юм байна.