“Тэтгэврийн хуулийн шинэчлэлийг эсэргүүцсэн ажил хаялтын улмаас Францын нийслэл хот Парисын гудамжинд 5400 тонн хог хаягдал бөөгнөрөөд байна. Ачигч нар ажил хаялт зарлаад бараг 7 хонолоо, тодруулбал өнгөрсөн мягмар гарагаас. Орон нутгийн оршин суугчид хэдий эсэргүүцэл зарласан хүмүүсийн нөхцөл байдлыг ойлгож байгаа ч гудамж талбай бөөн бөөн хогонд дарагдсан тухай гомдол мэдүүлж эхэлжээ” хэмээн “France 24” мэдээлэв. Парисын 20 тойргийн тал нь эсэргүүцлийн хөдөлгөөнд өртөөд байна. Өртөөгүй 10 дүүрэгт хувийн байгууллагын хог ачилт хэвийн явагдаж байгаа аж. Ажил хаялттай зэрэгцээд Парисын ойролцоох хог шатаах 3 заводын ажлыг зогсоожээ. Энэ нь нөхцөл байдлыг бүр даамжруулсан аж. 
Францын эрх баригчид Тэтгэврийн хуулийн өөрчлөлтийн хүрээнд тэтгэвэрт гарах насыг нэмж байгаа билээ. Францчууд одоо 62 настай тэтгэвэрт гардаг бол удахгүй 64 нас болгох юм байна. Өмнөх амралтын өдрүүдэд 1-3 сая францчууд гудамжинд гарч эсэргүүцсэн тухай дэлхийн ХМХ мэдээлж байсан билээ. “Би хувьдаа нөхцөл байдлыг ойлгож байгаа. Харин гудамжаар нэг хог хаягдал бөөгнөрснийг хараад жуулчид шоконд орсон байх. Парис хотыг бохир гэж ярьдаг ч энэ бол бүр өөр түвшин” хэмээн нийслэл хотын нэгэн иргэн ярилаа. Өөр нэг оршин суугч “Нэг талаас авч үзвэл би хог ачигчдын байр суурийг ойлгож байна. Гэвч нөгөө талаас үзэхэд манай гудамжууд маш муухай байна” хэмээжээ. 
Орчуулсан #МЦогзолмаа