“Парис 2024” Олимпын наадмын эрх олгох оноо цуглуулах тэмцээн энэ он гараад л эхэлсэн. Монгол Улс эрэгтэй, эмэгтэй бүтэн багаараа оролцох зорилт тавин бэлдэж байна. 3Х3 сагсан бөмбөгийн Олимпийн оноо олгох “Дэлхийн гран-при” тэмцээн манай Монгол Улсын нийслэл Улаанбаатарт явагдахаар болсныг дуулгая.
“FIBA 3X3 Ulaanbaatar Mayor Challenger” гэж нэрлэсэн энэ тэмцээн 2023 оны 6 сарын 16- 17-нд жанжин Сүхбаатарын талбайд зохион байгуулагдах юм. Зуны энэ тэмцээнд 11 орны шилдэг багууд оролцох бөгөөд дэлхийн 150 гаруй улсад шууд дамжуулна. Цаашид энэхүү тэмцээнийг Хотын даргын нэрэмжит болгож жил бүр зохион байгуулахаар Талууд тохиролцжээ. Энэ спорт манайд маш амжилттай хөгжиж байгаа. Монголын 3х3 сагсны баг саяхан Сингапурт явагдсан Ази тивийн аварга шалгаруулах 6-р тэмцээнд түрүүлж аварга болсынг бүгд мэдэх байх. Шигшээ баг маань финалд хүчирхэг Австралийн багийг буулган авч Ази тивдээ тэргүүлж алтан цомын эзэд болсон билээ. Иймээс ирэх зуны тэмцээнд манай шигшээ баг өндөр амжилт үзүүлнэ гэж монголчууд ихэд найдаж байна. Азийн аваргууд маань Олимпид түрүүлэх болтугай!
Нэмж өгүүлэхэд, 2021 оноос Улаанбаатар хотын 118 байршилд 3Х3 сагсан бөмбөгийн талбай байгуулах ажил эхэлсэн юм. Одоо 34 байршлын сагсны талбай баригдаж дуусч байгаа, мөн нэмж 40-ийг барихаар төлөвлөжээ.