Арабын Нэгдсэн Эмир улсын Дубай 2030 он гэхэд гадаадын аялагч жуулчдын тоог 40 саяд хүргэж энэ салбараас үндэсний эдийн засагт оруулах хувь нэмрийг 400 тэрбум дирхам буюу 123 тэрбум ам.доллар болгох төлөвлөгөөгөө танилцууллаа. АНЭУ-ын Ерөнхий сайд, Дубайн захирагч, шейх Мухаммед бен Рашид Аль Мактум энэ мэдэгдлийг “Arabian Travel Market 2023” олон улсын жуулчлалын үзэсгэлэн дээр хүрэлцэн ирэхдээ хийжээ. “Аялал жуулчлалын салбар маань Цар тахлын дараа сэргэлээ. 2022 онд Дубайд ирсэн жуулчдын зарцуулсан мөнгө 70% нэмэгдэж 121 тэрбум дирхам (33 тэрбум ам.доллар) болжээ. Энэ үзүүлэлтээр манай Дубай бүс нутагтаа тэргүүлж байна. Бид жуулчдад үзүүлэх үйлчилгээний чанараа дээшлүүлж улмаар АНЭУ-ын дэлхийн бизнес, жуулчлалын хамгийн шилдэг хот болгох зорилт тавьсан. Аялал жуулчлалын салбар бол орон нутгийн эдийн засгийн гол баганы нэг бөгөөд ойрын 10 жилд эдийн засгийн өсөлтийн хөдөлгүүр байх юм. Аялал жуулчлал бол нилээд их хэмжээний хөрөнгө оруулалт авч ирдэг, Дубайн хувьд эдийн засгийн онцгой үнэ цэнэтэй. Дубайн Засгийн газар нь өндөр стандартын чанарыг дэмжихийн тулд салбарын тэргүүлэгч тоглогчидтай идэвхтэй хамтран ажилладаг” хэмээн АНЭУ-ын Ерөнхий сайд Мухаммед бен Рашид Аль Мактум хэллээ. 
Харин Абу-Дабийн Аялал жуулчлалын яам 2023 оныг дуустал нийслэлд 24 сая жуулчныг аялуулна хэмээн өнгөрсөн 7 хоногт мэдэгдсэн. Сонирхуулахад, 2022 онд 18 сая жуулчин энд ирж зочид буудлуудын дүүргэлт дунджаар 70% байв. Ялангуяа Энэтхэг, Саудын Араб, Англи, АНУ зэрэг орноос хамгийн олон жуулчин АНЭУ-ын нийслэлд иржээ. АНЭУ түүнчлэн аливаа нэгэн үйл явдалд зориулсан жуулчлалыг ихэд дэмждэг, тухайлбал “Guns N' Roses”, “Backstreet Boys”зэрэг алдартай хамтлагуудын тоглолт, “Формула 1”-н Гран при тэмцээн, “NBA” ба “UFC” зэрэг спортын арга хэмжээ. 
#МЦогзолмаа орчуулав