Дэлхийн алдартай хөлбөмбөгчин, “Алтан бөмбөг”-ийн 5 удаагийн эзэн Криштиан Роналдо мягмар гарагт албан ёсоор Саудын Араб улсын “Аль-Наср” хөлбөмбөгийн клубт шилжиж очив. 37 настай Роналдо 2025 оны 6 сар хүртэл энэ клубтэй гэрээ байгуулсан ба “7” дугаартай тоглоно. Тэр үүнийхээ төлөө 214 сая доллар авна, нийт цалин биш ганцхан жилийнх шүү. Энэ бол алдарт Килиан Мбаппе (63 сая доллар), домогт Леонель Месси (41 сая доллар) нарын авдаг цалинг нийлүүлснээс ч 2-3 дахин их мөнгө. Роналдо ийнхүү манай гарагийн хамгийн үнэтэй хөлбөмбөгчин болжээ. Түүнээс гадна түүний гэр бүлийг тансаг, сайхан амьдруулах бүх нөхцлийг саудитууд хангасан. Тэр бүү хэл хэрэв дасгалжуулагч нь таалагдахгүй бол солих эрхийг ч өгчээ. 
Роналдо “Хөлбөмбөг сүүлийн 10-15 жилд их өөрчлөгдлөө, олон сайн баг гарч ирлээ. Саудын шигшээ бол Аргентиныг ялсан цорын ганц баг гэдгийг бүү мартаарай.... Би Европын хөлбөмбөгт бүгдийг хожсон, энд хийх ажлаа дууслаа" гэж ярилцлага өгөхдөө хэлжээ.
Криштиан Роналдо өмнө нь Португалийн “Спортинг”, Английн “Манчестер Юнайтед”, Испаний “Реал”, Италийн “Ювентус” клубт тоглож байсан юм. Тэрбээр Аваргуудын лигт 5 удаа, Английн аваргад 3 удаа, Испаний аваргад 2 удаа, Италийн аваргад 2 удаа түрүүлсэн. Португалийн Шигшээ багтай 2016 оны Европын аварга, 2018/2019 онд Үндэстнүүдийн лигт ялсан билээ.