Туркменистан улс шинэ, ухаалаг хоттой боллоо. Өнөөдөр анхны ухаалаг хотыг нээх ёслолд Орос, Турк, Австри, Япон, Азербайжан, Солонгос, Армян, Герман, Гүру, Киргиз, Хятад, Катар, Узбекистан зэрэг дэлхийн 14 орны зочид, мөн НҮБ, ЮНЕСКО, UN-Habitat, ЮНЕСКО, Персийн булангийн орнуудын хамтын ажиллагааны холбоо зэрэг олон улсын 12 байгууллагын төлөөлөгчид хүрэлцэн иржээ. Ашхабад хотоос баруун урагш 30 км зайд оршдог шинэ хотыг экс Ерөнхийлөгч Гурбангулы Бердымухамедовад зориулан Аркадаг гэж нэрлэсэн аж. Аркадаг (Ивээгч) гэдэг нь түүний албан ёсны цол хэргэм юм байна. 66 настай Гурбангулы Бердымухамедов одоо парламентын тэргүүлэгч билээ. 
“Аркадаг бол уламжлал ба орчин үеийг хослуулсан архитектур, дизайнтай. Хотын дэд бүтэц дэлхийн түвшинд нийцсэн төдийгүй бүрэн эко. Шинэ хотын гудамжаар зөвхөн эко тээврийн хэрэгсэл зорчино, жишээлбэл цахилгаан автобус, цахилгаан такси. Аркадаг хот бол дэлхийн хот барилгажилт, инженер-техникийн хувьд хамгийн шинэ, дэвшилтэт бүхнийг шингээсэн” хэмээн тус орны ХМХ бичжээ. Нээлтийн үеэр урлаг соёлын арга хэмжээ явагдаж, усан оргилуурыг ажиллуулж нээв..... Хотын төвд Акхан хөшөө сүндэрлэдэг, энэ бол Гиннесийн дээд амжилтын номонд бүртгэгдсэн ахалтекинск үүлдийн морины хөшөө. Өнөөдөр шинэ хотын телевиз анхны нэвтрүүлгээ цацаж, түүнчлэн “Аркадаг” гэж нэрлэсэн сонины анхны дугаар хэвлэгдлээ. 
Гурбангулы Бердымухамедовын төрсөн өдөр буюу өнөөдөр шинэ хотыг нээсэн нь учиртай. Тэр л энэ хотыг санаачлан бариулж байгаа аж. Хотыг 2019 оноос 2 үе шаттай барьж эхэлсэн. Эхний үед нийт 336 ширхэг орчин үеийн байшин барилга барьжээ. 2 давхар болон өндөр орон сууц, нийтийн ба боловсрол, эмнэлэг, спорт, соёлын зориулалттай объектууд, инженерийн системүүд. Энэ үе шатанд 3,3 тэрбум доллар зарцуулжээ. Хот барих 2-р үе шат 2023-2026 онд үргэлжилнэ. Энэ хугацаанд үйлчилгээний болон аж үйлдвэрлэлийн объектуудыг барьж дуусна: хүнсний үйлдвэр, аж үйлдвэр, завод фабрик, эмийн болон анагаахын зориулалтай бүтээгдэхүүний үйлдвэр.... Энд 70 мянган гэр бүл амьдарна гэж төлөвлөжээ. 
#МЦогзолмаа орчуулав.