“Хятадын эрх баригчид коронавирүсийн халдвар авсны улмаас нас барсан хүмүүсийн жинхэнэ тоог нууж байна. Тус улсад “тэг ковид” бодлогыг цуцалсны дараа 2 сарын хугацаанд 1,87 сая хятадууд ковидоор нас барсан” хэмээн “jamanetwork.com” мэдээллээ. Сиэтл дэх Фред Хатчинскийн Хавдрын төв өөрийн судалгаа явуулсны эцэст 2022 оны 12 сараас 2023 оны 1 сарын хугацаанд Хятадад “хэт олон үхэл” тохиосныг олж тогтоосон гэжээ. Тэд энэхүү судалгаандаа Хятад улсын Бээжингийн их сургууль, мөн Цинхуа ихсургууль, Харбины Технологийн дээд сургуулиудын нийтэлсэн нас баралтын мэдээллийг ашигласнаас гадна тус улсад хамгийн өргөн хэрэглэгддэг “Baidu” хайлтын системд түлхүүр үгсийн тусламжтай хайлт хийсэн. Дараа нь тэд математик аргачлалаар тооцоолж Хятад даяар хичнээн хүн ковидоор нас барсныг гаргасан юм байна. 
Хятадын өвчний хяналт, урьдчилсан сэргийлэх төв “Цар тахлын үеэр Хөл хорио, хориг арга хэмжээг цуцалсны дараа 1 тэрбум гаруй хүн коронавирүсийн халдвар авсан, энэ бол манай хүн амын 82,4%” хэмээн мэдээлсэн. 
Нэмж өгүүлэхэд, “COVID 19” бүрэн дарагдаагүй, шинэ штамм илэрсээр байна. “Шинэ штаммыг BA.2.86 гэж нэрлэсэн. Одоогоор энэ штамм Америк, Дани, Израильд илэрчээ” хэмээн АНУ-ын Өвчний хяналт, урьдчилсан сэргийлэх төв (CDC) мэдэгдэв.