АНУ-ын “Gilead Sciences” компани аймшигт ДОХ-оос 100% хамгаалдаг тариа бүтээсэн тухай “New Atlas” мэдээлэв. “ДОХ-ын эхний болон хожуу үе шатанд ч энэ тариаг хэрэглэх боломжтой, харин энэ өвчнөөс сэргийлэхийн тулд жилд 2 удаа арьсан доор тарих юм. ДОХ-ын эсрэг шинэ бүтээгдэхүүн -ленакапавир бол уг өвчний халдвар тархахыг бүрэн зогсоож 100% үр дүнтэй эмчилдэг болохыг манай судалгаа туршилт нотолсон” хэмээн “Gilead Sciences”-н ерөнхий эмч Мердад Парси ярьжээ. 
“Шинэ бүтээгдэхүүний туршилтад Өмнөд Африк, Уганда улсын 16-25 насны 5300 гаруй эмэгтэй сайн дураар хамрагдсан. Тэднийг 3 бүлэг болгон хуваав. 2134 эмэгтэй жилд 2 удаа ленакапавир тариулсан бол бусад нь өдөр бүр “Truvada”, эсвэл “Descovy” эм уусан. Туршилтын үеэр ленакапавир тариа 100% үр дүн өгч түүнийг хэрэглэсэн эмэгтэйчүүдээс нэг нь ч өвчлөөгүй. Гэтэл “Truvada” уусан 1068 хүнээс 16 нь (1,5%), харин “Descovy” хэрэглэсэн 2136 эмэгтэйн 39 (1,8%) нь өвджээ. Одоо ленакапавирыг дан эрчүүд дээр 7 оронд туршиж байгаа. Тухайлбал, Аргентин, АНУ, Бразил, Мексик, Перу, Өмнөд Африк, Таиланд. Энэ туршилт 2024 оны сүүлээр дуусна... ДОХ-ын эсрэг тарианы нэг тун 21125 долларын үнэтэй” гэж “Neurology Advisor” бичжээ. 
“Гэхдээ энэ шинэ тариа бол дархлааны эсүүдийн ялгаруулсан моноклональ эсрэг биет, ийм учраас 1-2 жилийн дараа үйлчилгээ буурна. Яагаад гэвэл, ДОХ-ын вирүүс тус тарианд амархан дасан зохицох чадвартай” гэж ОХУ-ын вирүүс судлаач Павел Волчков мэдэгдэв.
“2022 онд дэлхийн 1,3 сая хүн ДОХ-ын халдвар авсан. Жилд 630 мянган хүн энэ өвчнөөр нас барж байна. 1981 онд ДОХ-ын анхны тохиолдлыг албан ёсоор бүртгэснээс хойш манай гарагийн 40 сая гаруй хүн уг өвчнөөр нас барлаа” хэмээн ДЭМБ мэдээлжээ. 
#МЦогзолмаа орчуулав.