Цахиурын хөндийн (Silicon Valley) тухай сонсоогүй хүн байхгүй байх. Энэ бол АНУ-ын Калифорни мужийн Сан-Франциско хотын өмнөд хэсэгт оршдог өндөр технологийн компьютер, микропроцессор, программ хангамж боловсруулах, хөдөлгөөнт ухаалаг гар утас, биотехнологи зэрэг инновацийн компаниуд олноор төвлөрсөн газар билээ. Эндхийн тэрбумнууд өөрсдийн мөрөөдлийн хотоо байгуулахаар төлөвлөснөө мэдэгдлээ. Тэд Калифорний хойд хэсэгт орших Солано тойрогт 2’023’500 га газар худалдаж аваад ирээдүйн эко хотынхоо төслийг захиалжээ. “Зүгээр нэг хот биш нов ногоон цэцэрлэгт хүрээлэн мэт экр хотыг мөн тийм энерги, технологитой барихаар төлөвлөсөн. Байшин барилга бүр нь уран баримлаар чимэглэгдсэн, дээр үеийнх шиг вааран дээвэртэй 2 давхар таунхаус, гэхдээ төв хэсэгтээ орчин үеийнхийг сүндэрлүүлнэ. Явган зорчигчдын бүс, цахилгаан энергийн экологийн нарны зайгаас гаргаж авна. Хамгийн гол нь маш тавлаг тухтай, гэр бүлийн хот болох юм. Энд олон арван мянган хүн амьдарна. Мянга мянган ажлын байр бий болохын зэрэгцээ аялал жуулчлалын төв болох аж” хэмээн “Gizmodo” сонин бичжээ. 
“Flannery Associates” фирмийн толгой компани “California Forever” зарим зураг төслөө танилцуулав. Тус компани фермерүүдээс газар худалдаж авахад одоогоор 800 сая доллар зарцуулаад байна. 
Төслийг санаачлагчид, технологийн салбарын томчуудыг дурдвал: “LinkedIn”-ий Рид Хоффман, “Andreessen Horowitz”-ий Марк Андриссен, Крис Диксон, “Stripe”-н Патрик ба Жон Коллисон, “Emerson Collective”-н Лорен Пауэлл Жобс (Steve Jobs-н эхнэр), бас Майкл Мориц, Нэт Фридман, Дэниел Гросс...