ДЭМБ мэдэгдэл гаргажээ. “Гаазын зурваст тог цахилгаан, харилцаа холбоог бүрэн тасалсан учраас манай байгууллага өөрийн ажилтнуудтайгаа холбоо тасарлаа. Зөрчилд хамрагдсан Талуудад хандан энгийн хүн ам, иргэний зориулалтай дэд бүтцийг хамгаалах арга хэмжээ авах шаардлагатайг бид сануулж байна. Энэ нь мөн эрүүл мэндийн салбарын ажилтнууд, өвчтөнүүд, эмнэлгийн байгууллагууд болон Түргэн тусламжийн машинд, түүнчлэн эдгээр байгууллагуудад толгой хоргодож буй иргэдэд хамаатай” хэмээн тус мэдэгдэлд дурдсан. "Гаазын зурвас дахь бүх эмнэлэг дээд хүчин чадлаараа ажиллаж байна, огцом нэмэгдсэн өвчтөнүүдийг хүлээн авах бас мянга мянган энгийн хүмүүсийг хоргодуулах боломж хомс болжээ... Энэ бол сүйрэл дээр сүйрэл болж нэрмэлээ. Эрүүл мэндийн салбарын хэрэгцээг хангах манай байгууллагын чадвар маш хурдан буурч байгаа” гэж ДЭМБ-ын Онц байдлын бүс нутгийн удирдлагын тэргүүн Рик Бреннан ярилаа. 
Хүүхдийн сан -"UNICEF"-н тэргүүн Кэтрин Рассел НҮБ-ын Аюулгүйн зөвлөлд үг хэлэхдээ “Гаазын салбар сүйрлийн ирмэг дээр иржээ... Энд ус хүрэлцэхгүй байна. Гаазын зурвасын ус хангамжийн систем эвдэрч нурсан, 2 сая хүн усны хомсдолд орох эрсдэлтэй” гэж мэдэгдсэнийг “CNN” агентлаг дамжуулав.