Ирландын Дублин хотын Тринитийн их сургуулийн эрдэмтэд коронавирүсийн хүнд хэлбэрээс сэргийлэх энгийн бөгөөд хүртээмжтэй арга замыг тодруулах туршилт явуулжээ. 2020 -2022 онд явуулсан туршилтуудаас үзэхэд давстай усаар хамраа угааж хоолой зайлах нь ковид хүндрэхээс сэргийлж байв. Коронавирүсийн халдвар авсан 55 хүн уг туршилтад хамрагджээ. Түүнчлэн хяналтын бүлэг байгуулж 9398 хүнийг хамруулсан, гэхдээ тэд ам хамраа давстай усаар зайлаагүй.
Оролцогчид 14 өдрийн турш өдөрт 4 удаа давстай усаар хоолойгоо зайлж хамраа угааж байв. Тэднийг дотор нь 2 хувааж давсны сул болон хүчтэй уусмалыг өгч туршсан. Ингээд туршилтын үр дүнг гаргахад давсны сул уусмал ашигласан эхний бүлгийн өвчтөнүүдийн 18,5% нь эмнэлэгт хэвтжээ. Харин давсны хүчтэй уусмал хэрэглэсэн 2-р бүлгийн хүмүүсийн 21,4% нь эмнэлэгт хандаж эмчлүүлсэн аж. Гэтэл хяналтын бүлгийн оролцогчдын 58,8% нь эмнэлэгт хэвтсэн. 
“Давстай усаар хамар, хоолойгоо зайлсны ачаар хамар болон багалзуур хоолойд нэвтэрсэн вирүсүүдийг гадагшлуулна, улмаар уушиг руу орох нь багасдаг. Ингэснээр хатгаа тусах эрсдэл буурдаг. Давс мөн амьсгалын замын салслаг бүрхүүлийн хамгаалах чадварыг нэмэгдүүлж вирүс өсч олшрохоос сэргийлнэ. Энэ аргаар ковид төдийгүй ханиад томуу, амьсгалын замын өвчин тусах, хүндрэл үүсэхээс сэргийлэх төдийгүй хурдан эдгэрэх боломжтой” гэж эрдэмтэд тайлбарлалаа.