Хятад гүрний Сычуань мужийн Чэндү хотод тус орны анхны, автоматжуулсан босоо  ферм ашиглалтад орлоо. Тус фермийг Хятадын Хөдөө аж ахуйн Академийн дэргэдэх Хотын хөдөө аж ахуйн хүрээлэн бие даан боловсруулж хэрэгжүүлсэн аж. Автоматжуулсан, босоо  ферм гэдэг нь хүнсний бүтээгдэхүүнийг тасралтгүй, өндөр үр ашигтай үйлдвэрлэх олон түвшинт систем. Энэ системийг том хотууд төдийгүй элсэн цөлд, эзгүй талд ч ашиглах боломжтой.
Хүнсээр тасралтгүй, тогтвортой хангах, мөн ашиглах газар талбайгаа огцом нэмэгдүүлэх, хөдөө аж ахуйн ургамлын шинэ үүлдрийг ургуулах, тэжээлийн уусмалыг автоматаар өгөх, Хиймэл оюунд суурилсан ухаалаг удирдлага гэх зэргээр босоо ферм олон давуу талтай.
Хотын хөдөө аж ахуйн хүрээлэнгийн дэд захирал Гань Бин Чэн “Манай энэ автоматжуулсан ферм бол дэлхийд хамгийн өндөр төдийгүй хамгийн дэвшилтэт. Босоо ферм хэзээ ч цаг уурын өөрчлөлтөд өртөхгүй, 35 хоногт латук салаатын ургац авчихна. Мөн бид олон төрлийн навчит ногоо, жимс жимсгэнэ, мөөгийг асар их хэмжээгээр үйлдвэрлэж байгаа” гэж ярилаа. Харин тус хүрээлэнгийн эрдэм шинжилгээний ажилтан Ли Зун Гэний ярьснаар босоо фермээс 1 жилд 10 гаруй удаа хүнсний ногооны ургац хураах аж. Тэрбээр “Босоо фермээс жилд 50 тонн ногоо хураана, энэ бол 4 га талбайн ургацтай тэнцэх юм. Босоо фермийг нэвтрүүлснээр газар шороог оновчтой, үр өгөөжтэй ашиглана, тариалангийн талбайн нөөцөө хэмнэх боломжтой” гэж мэдэгдэв. 
#МЦогзолмаа орчуулав.