Испани улсын Засгийн газар гадаадын иргэдэд олгодог “алтан виза” хөтөлбөрөө цуцлахаар болсон тухай “Financial Times” сонин мэдээлэв. Ерөнхий сайд Педро Санчес “Европын холбооны бус орнуудын иргэд манай эх оронд ирээд 500 мянган еврогоос дээш хэмжээний мөнгийг үл хөдлөх хөрөнгийн салбарт оруулбал 3 жилийн хугацаагаар оршин суух эрх авдаг. Тэдэнд мөн ажиллах зөвшөөрөл олгож байгаа. Томоохон хотуудад 100 алтан визагийн 94 нь үл хөдлөх хөрөнгө худалдан авагчдад ногдох болжээ. Өнөөдөр Испаний иргэдэд орон сууцны хүртээмж муудсан, үнэ ханш өсч байгаа учир бид “алтан виза” хөтөлбөрөөс татгалзахаар төлөвлөсөн. Яагаад гэвэл, том хотуудад ажиллаж амьдарч татвараа төлдөг хүмүүст аятайхан орон сууц олдохоо больжээ” хэмээн мэдэгдлээ. 
Испани 2013 оноос 2022 онд 5000 орчим алтан виза олгожээ. Хамгийн олон алтан визаг хятадууд авсан юм байна. Өмнө нь, Португал ба Ирланд улсууд "алтан виза"-гүй болсон билээ.