ОХУ-ын Хиагтын хилээр далайн гаралтай амьтныг хууль бусаар, олноор Монгол руу оруулахыг завдсан монголчууд баригджээ. Тэд 2 суудлын машиндаа 9,5 мянга гаруй хатаасан трепанг гэдэг далайн амьтныг ачиж яваад хил дээр хураалгасан аж. Трепанг бол Оросын Алс Дорнодын далай тэнгист амьдардаг далайн амьтан. Түүнийг салаат хийхэд ашигладаг ба Хятад, Солонгос, Японд онцгой, тансаг хүнс гэж тооцогддог юм байна. 
“Бид дараа нь Хиагтын агуулахад нэгжлэг явуулж 117 мянган трепангийг илрүүллээ. Тэдгээрийг бас Монгол руу зөөвөрлөхөөр бэлдсэн байв. Хурааж авсан хууль бус барааны хэмжээ 360 кг давсан, үнэ өртөг нь 28 сая гаруй рубль хүрсэн” хэмээн ОХУ-ын Буриад улсын Хил хязгаарыг удирдах газрын Аюулгүйн алба мэдээлснийг тус орны ХМХ дамжууллаа.