“Энэ улиралд Франц, Испаний зарим нутагт усны хэрэглээг хязгаарласан. 6 сарын сүүлээр зарим нутагт агаарын температур 44 хэм давлаа. 6 сарын 1-10-нд Испаний газар нутгийн 60%-д нь гантай байсан. Зөвхөн шугам хоолойн алдагдлын улмаас Европ ундны усныхаа 20-25%-ийг алддаг тухай Европын хүнсний ус нийлүүлэгчдийн үндэсний холбоо мэдээллээ” хэмээн “Sky News” дамжуулав.
Цаг уурын судалгаагаар дагнадаг Европын обсерваторийн мэргэжилтнүүд ““Аймшигт ган гачиг удахгүй Европыг нөмрөн авч усны төлөөх тулаан эхэлнэ...  Сүүлийн жилүүдийн цаг уурын байдалд бид дүгнэлт хийсэн. Европ тивийн газар нутгийн гуравны нэгээс илүү хувь нь гангийн өмнөх үед байна, харин 10%-д нь одоо их ган гачиг нүүрлэжээ. Энд бид зөвхөн энэ зуны тухай яриагүй, цаг уурын даяаршсан өөрчлөлтийн тухай сэрэмжлүүлж байна. Ер нь ган гачиг 2018 оноос хойш янз бүрийн хэлбэрээр илэрч байгаа. Европт усны нийт алдагдал жилд 84 тэрбум тонн хүрчээ” гэж мэдээллээ. Энэ таамаглалыг Австралийн их сургуулийн судалгаа баталж байна. “Европ сүүлийн жилүүдэд асар их хэмжээний хөрсний усаа тогтмол алдаж байгаа, үүнийгээ борооны усаар нөхөж чадахаа больсон” гэж Австралийн эрдэмтэд тайлбарлалаа. 
Цаг уурын тэмцэгчид, эко идэвхтнүүд ган гачгийн улмаас Испаний гольфид “дайн зарлаж” улс даяар эсэргүүцлийн хөдөлгөөн өрнүүлж байна. “Энэ бол усыг ашиггүй зүйлд зарцуулж байгаа жишээ. Яагаад гэвэл, гольфын нэг нүхэнд өдөрт 100 мянга гаруй литр ус зарцуулдаг. Гэтэл манай орны хүн амын ердөө 0,6% нь гольф тоглодог” гэж эко идэвхтнүүд шүүмжлэв. Тэд мөн Испаний өнцөг булан бүрд  орших 10 гольф-клубын талбайг цементээр бүрж орхижээ. Харин “Extinction Rebellion Spain”-н эко идэвхтнүүд “Ус бол нийтийн баялаг”,  “Анхаар! Ган гачиг! Цаг уурын шударга ёсны төлөө гольф клуб хаагдсан” зэрэг зурагт хуудас барьж жагсч байна. 
Нэмж өгүүлэхэд, Португал улсын газар нутгийн 90% ган гачигт нэрвэгджээ. Иймээс тус орны Засгийн газар ядуурсан фермерүүддээ туслахын тулд Европын холбооноос санхүүгийн тусламж хүслээ.
#МЦогзолмаа орчуулав.